Ifishinte Fya Muli Baibele
Isambililo 1: LESA
Ukubako Kwakwa Lesa | Umusango Wakwa Lesa | Ishina No Musango Wakwa Lesa | BaMalaika | Cakulundapo (''Lesa Mupashi'' (Yohane 4:24), Ukubomfya Ishina Lyakwa Lesa, Ukusokoloka Kwakwa Lesa) | Amepusho

Cakulundapo 2: Ukubomfya Ishina Lyakwa Lesa

Ifwe twamona ukuti Ishina lyakwa Lesa ne lya Mwana Wakwe Yesu lyalikwata ico lipilibula icashika nganshi. Ilyo ifwe tusosa palwakwa 'Lesa' ifwe tulekumya pa cishinka conse ca kupekanya Kwakwe ukwa cipeshamano ukwa kutemwa ne cine. Eico icakuti Ishina lyakwa Lesa kuti lyaboomfiwa apaafye nge shiwi lya kulapa nangu ilya kulangilamo ubukali, cili cimo pa fintu fya musaalula nganshi ifyo umuntu engacita kuli Kapaanga wakwe. Pa mulandu uyu umuntu onse u ulefwaya ukusekesha Lesa no kucindika Wene ali no kuboomba na maka yonse ukukaana ukuboomfya Ishina lyakwa Lesa mu musamwe. Mu bantu abengi mwi sonde monse ukupoonta kwa musango uyu kwalisanguka iciputulwa icalinga ica nsoselo ya nshiku shino; Ukufumako kuli ico icili e musango wa nshita shonse tacili no kuba icanaka. Ipepo lya pa mutima ku kwafwilisha kwakwa Lesa muli ici icine cine talili na kuya ukwabula ukumfwiikwa kuli Wene. Abo abali mu ncende ya butungulushi bweesu na maka yesu, pamo nga abana, kuti baibukishiwako pamo palwa mulandu ukalamba wa kupoonta: ''Pantu Yehoba takalinge wene uwabula umulandu uyo ubuula Ishina Lyakwe apaafye'' (Amalango 5:11).

Ku lubali lumbi kuli abo abapatikisha ukuti ulukuta lwa cine ulwa Bwina Kristu lufwile ukuboomfya amashiwi ya ciHebere Yahweh nangu Yehoba mwi shina lyaluko. Abantanshi pakati ka aba ni baCitawala, abo abapatikisha ukuti kano fye umwina Kristu aiita umwine ukuti ni 'Inte yakwa Yehoba' nga teifyo ninshi wene takweete ukwampaana na Lesa.

Pakucita ici, abantu ba musango uyu baleboomfya Ishina lyakwa Lesa ilya mushilo kabili ilya cipeshamano ku kukosha umusango wa kuimona ukusanguluka kwa bumupashi, na mu kucita ifi bene basuula abantu bambi pa kulumbula fye nangu ukuboomfya kwe shiwi limo. Uku te kulanda ukuti ukuboomfya kwe Shina lyakwa Lesa kuli cilubo; cene cili icalinga nganshi ku mapepo yesu cila muntu panuma ifwe twabatishiwa bwino bwino mwi Shina ili. Lelo, Icipingo Cipya, tacipeela kuli ifwe icilangililo nangu cimo icakuti ici cilefwaikwa nangu fye ukukabilwa kuli Lesa. Wene acilingenye ukupuutwamo kwa Cipingo Cipya pakuti cene cilembwe mu ciGreek, ukuboomfya fye ishiwi limo pali 'Lesa' - 'theos', ilipilibula 'umukalamba umo'. Takuli ukulekanya muli lyene pakati kakwa 'Lesa' na 'Yahweh', nangu ukubako ifunde ilyashininkishiwa ilikumine kuli ifyo abatetekela balingile ukuita abene nge bumba. Petro asosa palwa watetekela nga ''Umwina Kristu'' ukucila nga 'umuntu wakwa Yehoba' nangu icintu cimo icapalako (1 Petro 4:16). Ukukonkomesha ukucilamo pa kuboomfya kwe shina 'Yehoba' kutungulula ku kuceefya kwa mulimo ne cifulo cakwa Shikulu Yesu, mu nshila iyapalana kuli ifyo 'abena Kristu bakabila ba mbila nsuma' abengi balandikisha pe shina ne cifulo cakwa Yesu ku kusuula kwa cifulo icikalamba icacilapo icakwa Lesa.

Amashina yambi yantu ibumba lya Bena Kristu bantanshi abatetekela baleiita abene tayalundapo ishina 'Yehoba':

- ''Ubukaaya bwakwa Israele'' (Abena Efese 2:12)

- ''Ukulongana kwa bonse kabili ulukuta lwe beli'' (AbaHebere 12:23)

- ''Ulukuta lwakwa Lesa'' (Imilimo 20:28)

- ''Ulukuta lwakwa Lesa wa mweo, ululi uluceshi kabili icishinte ca cine'' (1 Timote 3:15)

- ''Ing'anda yakwa Lesa'' (1 Timote 3:15).

Mu kupita, mona ukuti abatetekela tabaiitile abene 'Abena Kristu'; ili lyali lishina lyakutuumfya ilipilibula, 'abantu bakwa Kristu aba', ilyapangilwe na balwani babo.


  Back
Home
Next